Diogelwch ar y Ffordd

Bob dydd, mae'r Gwasanaeth Tân ac Achub yn delio â chanlyniadau Gwrthdrawiadau Traffig Ffyrdd, a'r effaith a gânt ar fywyd pobl a'n cymunedau. Yn wir, rydym bellach yn cael ein galw i achub nifer sylweddol fwy o bobl sydd wedi'u hanafu mewn gwrthdrawiadau traffig ffyrdd nag mewn tanau.

Yn ychwanegol at y canlyniadau trawmatig sy'n deillio o wrthdrawiadau traffig ffyrdd, mae yna hefyd oblygiadau cymdeithasol ehangach. Mae gwerth economaidd gwrthdrawiadau traffig ffyrdd bellach yn £1.9 miliwn fesul pob digwyddiad Lladd ac Anafu Difrifol (KSI).

Anafiadau Ffyrdd yng Nghymru
Blwyddyn	Lladdwyd	Anafwyd yn Ddifrifol	Anafwyd Ychydig	Pawb a Anafwyd
2018	103	1,028	4,627	5,758
2017	103	961	5,134	6,198
2016	103	1,005	5,745	6,853
2015	105	1,081	6,496	7,682
2014	103	1,160	6,945	8,108
2013	111	1,033	7,191	8,335

Yr hyn yr ydym am ei gyflawni

• Darparu gweithgareddau i wella diogelwch beicwyr modur ar y ffyrdd trwy annog pobl i ddilyn cyrsiau diogelwch beiciau modur.
• Datblygu cwrs ymyrraeth ieuenctid diogelwch ar y ffyrdd a fydd yn targedu'r bobl hynny y nodwyd eu bod yn peri risg uchel oherwydd eu hymddygiad.
• Targedu gweithgareddau ac ymyrraeth diogelwch ar y ffyrdd at yrwyr hŷn.

 

Rydym yn gweithio mewn partneriaeth ag Awdurdodau Lleol ac asiantaethau eraill i gyflawni'r Strategaeth Diogelwch ar y Ffyrdd i Gymru, ynghyd â'r targedau canlynol a amlinellir yn y Fframwaith.

• Erbyn 2020, sicrhau gostyngiad o 40% yn nifer y bobl sy'n cael eu lladd neu eu hanafu’n ddifrifol ar ffyrdd Cymru. Bydd hyn yn golygu y caiff 505 yn llai o bobl eu lladd neu eu hanafu’n ddifrifol.
• Erbyn 2020, sicrhau gostyngiad o 25% yn nifer y bobl sy'n cael eu lladd neu eu hanafu’n ddifrifol ar ffyrdd Cymru. Bydd hyn yn golygu y caiff 64 yn llai o bobl eu lladd neu eu hanafu’n ddifrifol.
• Erbyn 2020, sicrhau gostyngiad o 40% yn nifer y bobl ifanc (16-24 oed) sy'n cael eu lladd neu eu hanafu’n ddifrifol ar ffyrdd Cymru. Bydd hyn yn golygu y caiff 139 yn llai o bobl eu lladd neu eu hanafu’n ddifrifol.