Galwadau Diangen o Larymau Tân Awtomatig



Gwyliwch y animeiddiad byr hwn yn esbonio pam mae hyn yn digwydd a sut y bydd yn gwella'r gwasanaeth.

Mae youtube.com wedi'i rwystro oherwydd eich dewisiadau cwci cyfredol, gallwch newid y rheini trwy glicio ar y botwm cwci yn y gornel dde isaf ar unrhyw dudalen.


Beth yw Larwm Tân Awtomatig (LTA)?

Yn gyffredinol, mae Larwm Tân Awtomatig (LTA) yn cynnwys elfen sy'n canfod presenoldeb mwg neu fflamau ac elfen sy'n rhybuddio pobl am dân posibl trwy seinydd neu lais. Efallai y bydd rhai ohonyn nhw’n cael eu monitro gan gwmni allanol sy'n trosglwyddo'r neges actifadu i'n Hystafell Rheoli Tân, gelwir y cwmnïau hyn yn Ganolfannau Derbyn Larymau (ARCs).

Yn anffodus, nid yw'r rhan fwyaf o signalau o'r systemau hyn yn danau go iawn. Maen nhw’n alwadau diangen a achosir yn aml gan fygdarthau coginio, llwch neu ddiffyg cynnal a chadw. Mae'r negeseuon larymau tân diangen hyn yn golygu bod ein criwiau tân yn cael eu galw allan yn ddiangen.




Sut ydyn ni'n addasu'r ffordd rydyn ni'n ymateb i alwadau Larwm Tân Awtomatig?

O 1 Gorffennaf 2024, ni fyddwn yn ymateb i unrhyw alwadau sy’n deillio o systemau Larwm Tân Awtomatig (ddydd a nos) heblaw am y canlynol:

  1. Eiddo Preswyl (sy'n cynnwys cynlluniau byw dan warchod a chynorthwyedig, llety myfyrwyr, ysgolion preswyl, carcharau a llety ar y safle i staff y GIG)
  2. Cartrefi Nyrsio a Gofal
  3. Adeiladau sy'n destun Hysbysiad Gwahardd neu Orfodi diogelwch tân

Pam ydyn ni'n addasu'r ffordd rydyn ni'n ymateb i alwadau Larwm Tân Awtomatig?

  • Gall pob galwad diangen wneud pobl yn ddihid pan fyddan nhw’n clywed y larwm tân.
  • Mae cost i chi fel busnes neu sefydliad oherwydd yr amser cynhyrchiol a gollir.
  • Mae cost i Wasanaeth Tân ac Achub Canolbarth a Gorllewin Cymru o ddefnyddio adnoddau Ymladd Tân yn ddiangen.
  • Ni fydd Gwasanaeth Tân ac Achub Canolbarth a Gorllewin Cymru yn cael ei ddargyfeirio oddi wrth argyfyngau eraill, hyfforddiant neu waith atal ac amddiffyn arall.
  • Mae unrhyw leihad o ran symud cerbydau’n ddiangen yn golygu llai o risg ar ein ffyrdd.
  • Rydyn ni’n cyfyngu ar effaith amgylcheddol symudiad cerbydau’n ddiangen.

Byddwn bob amser yn ymateb i danau sydd wedi’u cadarnhau, a fydd yn denu ymateb brys llawn neu well, yn dibynnu ar y wybodaeth a dderbynnir.

Cofiwch: Mewn argyfwng neu os ydych yn gwybod bod tân mewn adeilad, ffoniwch 999 ar unwaith – hyd yn oed os oes gan yr adeilad larwm tân awtomatig.



Faint o alwadau diangen o Larymau Tân Awtomatig ydych chi'n ymateb iddyn nhw ar hyn o bryd?

Dros y pum mlynedd diwethaf, roedd 99% o'r digwyddiadau AFA Masnachol a fynychwyd gennym yn alwadau diangen. Roedd y rhain yn cyfrif am bron i un rhan o bump o’r holl ddigwyddiadau – hynny yw, chwe injan dân y dydd yn cael eu hanfon i alwadau diangen lle nad oes tân.

Beth sy'n achosi galwad diangen?

Mae systemau larwm tân a chanfod tân yn seinio naill ai o ganlyniad i gynnydd mewn gwres neu bresenoldeb mwg. Yn anffodus, gallan nhw hefyd adweithio i bethau fel stêm, mwg sigarét, fêps, chwistrellau aerosol neu fwg ysgafn o goginio. Gall y rhain gael eu hachosi gan arferion gwaith gwael, synwyryddion mewn lleoliad gwael neu system larwm tân nad yw'n cael ei chynnal a chadw’n iawn.

Ydy hyn yn berthnasol os ydw i'n byw mewn eiddo preswyl?

Nac ydy. Os ydych chi’n byw mewn eiddo preswyl sy'n cynnwys cartrefi preifat, tai gwarchod, fflatiau wedi’u hadeiladu’n bwrpasol, tai amlfeddiannaeth (HMO), neuaddau preswyl myfyrwyr, llety GIG neu ysgolion preswyl er enghraifft - byddwch yn dal i dderbyn ymateb Gwasanaeth Tân o alwadau Larwm Tân Awtomatig ar yr amod y gall y Ganolfan Derbyn Larymau nodi bod eich eiddo wedi'i ddosbarthu fel eiddo preswyl.

Beth yw fy nghyfrifoldebau fel perchennog busnes?

Mae gan berchnogion a rheolwyr busnes gyfrifoldebau cyfreithiol ynghylch diogelwch tân.

Dylech ystyried sut i ddefnyddio Larymau Tân Awtomatig fel rhan o'ch strategaeth dân ac, os oes angen, diweddaru eich asesiad risg tân a’ch cynllun gadael mewn argyfwng. Efallai y bydd angen i chi drefnu hyfforddiant ar gyfer staff sydd wedi'u dynodi'n wardeniaid tân, yn stiwardiaid neu'n ddeiliaid allweddi.

Os yw'ch larwm tân wedi'i gysylltu â Chanolfan Derbyn Larymau, gwnewch yn siŵr bod eich gwybodaeth am y deiliad allwedd yn ddigon cywir a chadarn i sicrhau bod deiliad allwedd ar gael bob amser yn ystod cyfnodau o absenoldeb staff neu pan fo'r eiddo’n wag. Efallai yr hoffech ystyried cysylltu eich system larwm i deledu cylch cyfyng.

Beth sydd angen i mi ei wneud nesaf?

Fel deiliad dyletswydd, rhaid i chi sicrhau bod eich eiddo yn ddiogel i staff, ymwelwyr a phreswylwyr os bydd tân. Mae gennych gyfrifoldeb o dan Orchymyn Diwygio Rheoleiddio (Diogelwch Tân) 2005 i gynnal y cyfleusterau a'r offer a ddarperir. Gallai methu â gwneud hyn arwain at erlyniad. Dylai staff a phreswylwyr fod yn ymwybodol o sut i ymateb yn ddiogel i Larymau Tân Awtomatig ym mhob safle. Gallai eu hanwybyddu neu dybio bod y Gwasanaeth Tân ac Achub wedi cael eu hysbysu roi pobl mewn perygl. 

Efallai y byddwch am gysylltu â'ch cwmni yswiriant i drafod y newidiadau mewn ymateb i seinio Larwm Tân Awtomatig, ond cofiwch y bydd Gwasanaeth Tân ac Achub Canolbarth a Gorllewin Cymru bob amser yn mynychu tân sydd wedi’i gadarnhau. Os oes tân, ffoniwch 999 ar unwaith.

Fireprotection@mawwfire.gov.uk