Canllawiau Gwneud Cais

Rydym ni eisiau sicrhau fod pob cam o’n proses recriwtio yn deg a’ch bod yn cael eich trin yn briodol. Mae gennym ddyletswydd i sicrhau na wahaniaethir yn erbyn unrhyw un ac rydym yn gobeithio, hyd yn oed os na chewch eich penodi, y byddwch yn teimlo i chi gael eich trin yn deg.

Wrth asesu eich cais, ni fyddwn yn ystyried unrhyw geisiadau blaenorol na gwybodaeth bersonol amdanoch. Oherwydd ein bod yn selio’r asesiad hwn ar eich ffurflen gais yn unig, mae’n bwysig iawn eich bod yn ei chwblhau mor gyflawn ag sy’n bosib, ac mae’r adrannau sy’n dilyn yn anelu at eich helpu i wneud hyn. Os na fedrwch gwblhau ffurflen gais ar y ffurf safonol, oherwydd anabledd neu ryw reswm arall, cysylltwch â ni am gyngor, os gwelwch yn dda.

Dylech chi ddod o hyd i’r canlynol yn y pecyn:

Ffurflen Gais

Swydd Ddisgrifiad: Mae’n amlinellu prif ddyletswyddau a gofynion y swydd.

Manyleb Person: Mae’n nodi’r sgiliau, profiad, cymwysterau a’r doniau yr ydym yn chwilio amdanynt ar gyfer y swydd yr ydych yn gwneud cais. Os credwch eich bod yn diwallu’r holl ofynion hanfodol, mae’n hollbwysig eich bod yn medru esbonio a dangos sut yr ydych yn gwneud hynny pan fyddwch yn cwblhau eich ffurflen gais.

Ffurflen Polisi Cyflogaeth Cyfleoedd Cyfartal: Rydym yn gofyn i’r holl ymgeiswyr ein helpu i fonitro tegwch ein proses recriwtio trwy gwblhau’r ffurflen hon. Gallwch ei chwblhau yn ei chyfanrwydd neu ran ohoni a’i dychwelyd gyda’ch ffurflen gais. Unwaith fyddwn wedi ei derbyn, byddwn yn ei gwahanu oddi wrth eich cais fel nad yw’n rhan o’r broses asesu. Caiff yr wybodaeth yma’i drin yn gyfrinachol. Os oes gennych unrhyw gwestiynau neu bryderon ynglŷn â hyn cysylltwch â’n Tîm Recriwtio, ar y rhif ffôn a roddir ar waelod y dudalen yma, os gwelwch yn dda.

Mae’n bosib bod yr adran hon wedi’i chwblhau yn barod, ond sicrhewch fod yr holl fanylion yn gyflawn ac yn gywir. Os nad dyma’r achos, cyfeiriwch at hysbyseb y swydd a chwblhewch yr adran hon, os gwelwch yn dda.

Rhowch eich manylion personol yn llawn ac yn glir, fel y gallwn gysylltu â chi am eich cais. Byddwn yn ysgrifennu atoch fel arfer, ond mae’n bosib y byddwn yn cysylltu â chi dros y ffôn neu ar e-bost. Wrth roi rhifau ffôn nodwch y Côd lleol, lle bod hynny’n briodol.

Mae’r adran hon yn ymwneud â manylion eich swydd bresennol. Os nad oes gennych swydd ar hyn o bryd, gadewch yr adran hon yn wag, os gwelwch yn dda.

Rhowch fanylion am unrhyw gymwysterau perthnasol sydd gennych a ble y cawsoch chi nhw. Dylent gynnwys gradd a lefel y cymhwyster.

Os nad oes gennych unrhyw gymwysterau rhowch lein trwy’r blwch, os gwelwch yn dda.

Os cewch eich gosod ar y rhestr fer ar gyfer cyfweliad, bydd angen i chi ddod â’ch tystysgrifau cymhwyster gwreiddiol gyda chi. Byddant yn cael eu gwirio ac, os fydd angen, byddwn yn cysylltu â’r corff dyfarnu i wirio’r cymhwyster.

Mae hon yn adran bwysig iawn, gan ei bod yn eich galluogi i ddatgan yn union sut credwch bydd eich sgiliau, eich profiad a’ch hyfforddiant yn eich galluogi i ddiwallu gofynion y swydd.

Dylech gysylltu eich datganiad ategol i’r Fanyleb Person, a nodwch yn glir pa brofiad, sgiliau neu hyfforddiant sydd gennych ar gyfer pob un o’r gofynion. Ceisiwch ddefnyddio enghreifftiau o waith neu hyfforddiant a gyflawnwyd gennych. Nid oes yn rhaid ei fod yn ymwneud â’r gwaith, os credwch ei fod yn berthnasol.

Dywedwch wrthym am unrhyw brofiadau, sgiliau neu hyfforddiant y credwch sy’n berthnasol i’r swydd. Wrth greu rhestr fer, ni allwn wneud rhagdybiaethau, felly os nad ydych yn ei gwneud hi’n glir eich bod yn diwallu’r meini prawf a amlinellwyd yn y Fanyleb Person, ni fyddwn yn medru mynd â’ch cais ymhellach.

Dywedwch wrthym os ydych yn perthyn i Gynghorydd neu berson sy’n gweithio i Wasanaeth Tân ac Achub Canolbarth a Gorllewin Cymru, oherwydd mae’n rhaid sicrhau nad yw penderfyniadau ynglŷn â’r rhestr fer a’r cyfweliadau’n cael eu gwneud gan unrhyw un sy’n perthyn i’r ymgeisydd, cyn belled ag sy’n bosib.

Gallech anghymwyso eich cais os nad ydych yn datgelu, neu os ceisiwch ddylanwadu ar y broses trwy, berthynas sydd gennych gydag un o’r uchod.

Y cyfan sydd angen i chi nodi yw’r nifer o ddyddiau ac achlysuron o salwch yn ystod y 12 mis diwethaf. Nid oes yn rhaid i chi ddatgelu’r rhesymau am eich salwch. Fodd bynnag, os cewch eich penodi i’r swydd, bydd gofyn i chi gwblhau holiadur meddygol cyn cyflogi, ac efallai bydd gofyn i chi ymweld â’n tîm Iechyd Galwedigaethol am asesiad meddygol, cyn y gellir cynnig swydd i chi. Bydd yr wybodaeth a roddwch yn gwbl gyfrinachol, a’r tîm Iechyd Galwedigaethol yn unig fydd yn cael mynediad i’r wybodaeth.

Mae rhai o’n swyddi’n golygu bydd angen gyrru a/neu’r gallu i deithio. Ticiwch y blwch priodol os ydych yn meddu ar drwydded yrru gyfredol. Gweler y Fanyleb Person i ganfod gofynion y swydd yr ydych yn gwneud cais amdani.

Mae’n RHAID i chi ddatgelu unrhyw euogfarnau blaenorol, gorchmynion rhwymo i gadw’r heddwch, neu rybuddion, boed yn gyfredol neu “wedi darfod”. Pe digwydd i chi gael cynnig y swydd dros dro, efallai bydd gofyn am ddatgeliad o gofnodion troseddol oddi wrth y Biwro Cofnodion Troseddol cyn i chi gael eich penodi, gan ddibynnu ar natur y swydd a geisir. Os cewch eich cyflogi, gallai methu datgelu’r rhain yn dilyn archwiliadau arwain at gamau disgyblu neu ddiswyddiad.

Nid yw datgelu euogfarn neu rybudd yn golygu o anghenraid na fyddwch yn cael eich penodi, bydd ymgeiswyr gydag euogfarn neu rybudd yn cael eu trin yn deg. Ni fydd manylion a ddarparwyd yn yr adran hon yn cael eu hystyried wrth greu’r rhestr fer, a bydd y penderfyniad am y penodiad yn cael ei wneud yng ngoleuni’r holl wybodaeth sydd ar gael, gan ystyried rhinweddau’r ymgeiswyr. Bydd yr holl wybodaeth a ddarparwyd yn cael ei drin yn gwbl gyfrinachol, a’r unig bobl fydd yn cael mynediad i’r wybodaeth fydd y rhai sy’n rhan o’r broses recriwtio.

Erbyn i chi arwyddo eich ffurflen gais, bydd y gwaith caled ar ben. Darllenwch y datganiad yn ofalus, os gwelwch yn dda, ac arwyddwch a rhowch ddyddiad lle gofynnir i chi wneud. Os ydych yn gwneud cais ar lein, ni fydd modd i chi wneud hyn. O dan yr amgylchiadau yma, byddwn yn gofyn i chi arwyddo a rhoi dyddiad ar gopi, os cewch eich dewis ar gyfer cyfweliad.