Adroddiad Blynyddol Amgylcheddol a Chynaliadwyedd

Mae Gwasanaeth Tân ac Achub Canolbarth a Gorllewin Cymru yn gweithio’n galed i ddarparu Gwasanaeth effeithlon ac effeithiol i’n cymuned leol.

Mae’r Gwasanaeth wedi ymrwymo i ddarparu Gwasanaeth rhagorol ac yn ymdrechu i wella’n barhaus y ffordd yr ydym yn gweithredu wrth leihau ein heffaith ar yr amgylchedd. Mae’r Gwasanaeth yn gweithio’n galed i fynd i’r afael â materion yn ymwneud â newid yn yr hinsawdd, disbyddu adnoddau a llygredd. Rydym yn cydnabod bod ein gweithrediadau yn cael effaith ar yr amgylchedd byd-eang a lleol ac rydym wedi ymrwymo i leihau cymaint â phosibl ar ein heffeithiau amgylcheddol andwyol.

Mae’r Adroddiad Amgylcheddol Blynyddol hwn yn amlinellu perfformiad a chyflawniadau Gwasanaeth Tân ac Achub Canolbarth a Gorllewin Cymru tuag at wireddu ein hamcanion amgylcheddol ym mlwyddyn ariannol 2022/23. Mae’n ystyried targedau Llywodraeth Cymru a thargedau Cenedlaethol yn ogystal â rhwymedigaethau statudol a osodir ar sefydliadau’r Sector Cyhoeddus yn sgil Deddf Llesiant Cenedlaethau’r Dyfodol (Cymru) 2015 a Deddf yr Amgylchedd (Cymru) 2016.

Mae’r Adroddiad yn amlinellu meysydd perfformiad allweddol y Gwasanaeth mewn meysydd lle gallwn gael yr effaith fwyaf ar yr amgylchedd, megis y defnydd o ynni, allyriadau carbon, y fflyd, cynhyrchu gwastraff a’r gadwyn gyflenwi.

Fel y Gwasanaeth Tân mwyaf yng Nghymru o ran ardal, mae Gwasanaeth Tân ac Achub Canolbarth a Gorllewin Cymru yn gyfrifol am 58 o orsafoedd tân mewn ardal sy’n cwmpasu 4,500 o filltiroedd sgwâr o dirwedd wledig yn bennaf, sef tri chwarter Cymru. Mae’r mathau o ddigwyddiadau yr ydym yn ymateb iddynt a’u nifer y tu hwnt i’n rheolaeth; yr hyn y gallwn ei reoli yw sut i fynd i’r afael â digwyddiad i gael yr effaith andwyol leiaf ar yr amgylchedd lle bo hynny’n rhesymol ymarferol. Rydym yn ceisio sicrhau bod ein gweithrediadau a’n gweithgareddau yn lleihau’r effaith y mae tanau yn ei chael ar yr amgylchedd trwy hyfforddiant, gan gydweithio â sefydliadau fel Cyfoeth Naturiol Cymru (CNC) a thrwy ymgysylltu â’r gymuned.

Mae cynaliadwyedd amgylcheddol yn ymwneud â gwella ansawdd bywyd a’r amgylchedd mewn ffordd nad yw’n achosi difrod anadferadwy nac yn atal cenedlaethau’r dyfodol rhag gallu elwa o’r pethau da rydym wedi dod yn gyfarwydd â nhw.

Mae’r amgylchedd wedi bod yn un o Ymrwymiadau Corfforaethol y Gwasanaeth dros y blynyddoedd diwethaf ac mae’n parhau i gael ei ystyried yn faes pwysig y mae angen gweithio tuag at ei wella, ym mhob agwedd ar weithgareddau’r Gwasanaeth.

Yn unol â’r trafodaethau yn COP26, mae angen parhau i leihau’r allyriadau sy’n deillio o fflyd a gweithgareddau’r gwasanaeth tân. Mae angen ystyried addasu a lliniaru mewn perthynas â Newid Hinsawdd ym mhob un o weithgareddau a chynlluniau’r Gwasanaeth. Rydym yn ymwybodol bod ein gweithrediadau yn dylanwadu ar yr amgylchedd byd-eang a lleol ac rydym wedi ymrwymo i leihau’r effeithiau andwyol yn sgil ein gweithgareddau.