Her Diffoddwyr Tân Cymru 2024

Ar Fehefin 1, ymgasglodd Diffoddwyr Tân o bob rhan o'r Deyrnas Unedig ym Marina Abertawe i gymryd rhan yn Her Diffoddwyr Tân Cymru, sy'n rhan o ras ranbarthol Her Diffoddwyr Tân Prydain.

Mae Her Diffoddwyr Tân Cymru yn cael ei threfnu gan Wasanaeth Tân ac Achub Canolbarth a Gorllewin Cymru (GTACGC), ac mae’n helpu i godi arian pwysig ar gyfer Elusen y Diffoddwyr Tân, sy'n cefnogi lles meddyliol ac iechyd corfforol yr holl aelodau o gymuned diffoddwyr tân y DU sy'n gwasanaethu ac sydd wedi ymddeol.

Cynhaliwyd y digwyddiad, a oedd wedi gwerthu allan mewn 8 awr, sef yr amser cyflymaf erioed, mewn lleoliad newydd eleni, sef Sgwâr Dylan Thomas, Marina Abertawe. Roedd y Sgwâr yn llawn o wylwyr o'r dechrau i'r diwedd trwy gydol y dydd. Yn ffodus, roedd yr haul yn tywynnu, a oedd yn ei gwneud yn wych i wylwyr ond hefyd yn llawer mwy anodd i'r cystadleuwyr.

Roedd pob cystadleuydd wedi'i wisgo mewn cit diffodd tân strwythurol llawn ac yn cymryd rhan mewn cyfres o heriau corfforol a gynlluniwyd i brofi eu cryfder, eu hystwythder a'u stamina. Roedd cyfanswm o wyth her i'w cwblhau. Roedd hyn yn cynnwys rhedeg 50m, cario pibell am 50m, cario a chodi offer Gwrthdrawiad Traffig Ffyrdd (RTC), taro â morthwyl, rhedeg gyda phibell am 50m arall, rholio pibell i fyny, cario cynhwysydd, ac yn olaf, llusgo dymi. Yr amser cyflymaf i gwblhau pob un o'r wyth her oedd yn ennill y ras.

Ochr yn ochr â'r heriau i ddiffoddwyr tân, cynhaliodd GTACGC ‘Bentref Diogelwch Cymunedol’ lle gallai aelodau'r cyhoedd gael mynediad i gyngor a gwybodaeth diogelwch am ddim gan ein Tîm Diogelwch Cymunedol yn ogystal â chan amrywiaeth o sefydliadau partneriaeth. Y rhai a ymunodd â ni ar y diwrnod oedd: HwbDementia Abertawe, Rhwydwaith Cymunedau Mwy Diogel Cymru, Cyngor Abertawe, Heneiddio'n Dda Abertawe, Imbiwlans darparu brechlynnau, Uned Llosgiadau Ysbyty Treforys, Cŵn Tywys Cymru, Heddlu De Cymru, Gan Bwyll, Bad Achub y Mwmbwls RNLI, Ymddiriedolaeth Gwasanaethau Ambiwlans Cymru, Y Groes Goch Brydeinig Abertawe ac Amgueddfa Genedlaethol y Glannau.

Hoffem ddiolch yn fawr iawn i bawb a gymerodd ran yn y digwyddiad. Yn enwedig i'r trefnwyr: Dominic Norcross, Luke Fisher, Tim Frost a'u tîm cyfan a Roshnara Ali am gydlynu'r Pentref Diogelwch Cymunedol. Hoffem hefyd ddiolch yn arbennig i Gadetiaid Tân GTACGC a weithiodd yn ddiflino trwy gydol y dydd, gan ailosod y cwrs ar ôl pob rownd, yn ogystal â chymryd rhan yn rhai o'r rasys eu hunain. Roedd y gwylwyr a oedd yn bresennol ar y diwrnod wedi gwneud y digwyddiad yn llwyddiant ysgubol. Roedd y gymeradwyaeth a'r brwdfrydedd cyson yn ysgogi pawb a gymerodd ran ac yn creu awyrgylch anhygoel i bawb.

Dywedodd y Prif Swyddog Tân Roger Thomas:

Roedd y diwrnod cyfan yn llwyddiant ysgubol, ac rydym yn edrych ymlaen at ddigwyddiad y flwyddyn nesaf!