Mae Bwrdd Tanau Gwyllt Cymru yn galw ar ffermwyr, tirfeddianwyr a chymunedau gwledig ledled Cymru i chwarae eu rhan wrth leihau’r risg o danau gwyllt yn y dyfodol drwy gefnogi’r ymgyrch #LlosgiIAmddiffyn eleni.
Daw’r apêl yn sgil un o’r tymhorau tanau gwyllt mwyaf y mae Cymru wedi’i weld. Haf 2026 oedd yr haf poethaf a gofnodwyd erioed yng Nghymru, ac roedd yn cynnwys y mis Gorffennaf sychaf a gofnodwyd erioed, gan greu amodau a ganiataodd i danau gwyllt ledaenu’n gyflym ar draws cefn gwlad.
Yn ystod mis Gorffennaf ac Awst, bu Gwasanaethau Tân ac Achub ledled Cymru yn delio â chyfres o ddigwyddiadau mawr yn ymwneud â thanau gwyllt, gan gynnwys ar Fynydd Conwy, Mynydd Llanwynno, yng Nghronfa Ddŵr Llangynidr ac yn Rhandir-mwyn.
Roedd y digwyddiadau hyn yn gofyn am ymatebion aml-asiantaethol ar raddfa fawr, gyda diffoddwyr tân yn gweithio ochr yn ochr â Chyfoeth Naturiol Cymru, awdurdodau lleol, tirfeddianwyr, cymunedau ffermio a phartneriaid eraill i ddiogelu pobl, eiddo, tir fferm a’r amgylchedd.
Teimlwyd yr effaith ymhell y tu hwnt i safle’r tân. Profodd cymunedau aflonyddwch ac ansicrwydd, effeithiwyd ar ardaloedd helaeth o dir ffermwyr a thirfeddianwyr, cafodd cynefinoedd gwerthfawr eu difrodi ac wynebodd y gwasanaethau brys bwysau parhaus drwy gydol yr haf. Mewn rhai ardaloedd, roedd angen cefnogaeth gan Wasanaethau Tân ac Achub cyfagos a phartneriaid arbenigol i helpu i reoli maint a hyd y digwyddiadau.
Mae digwyddiadau’r haf hwn wedi atgyfnerthu neges bwysig: ni all un sefydliad ar ei ben ei hun sicrhau gwydnwch yn wyneb tanau gwyllt. Mae’n dibynnu ar bartneriaethau cryf rhwng rheolwyr tir, gwasanaethau brys, cyrff cyhoeddus, cymunedau lleol a’r llywodraeth, oll yn cydweithio i leihau risg a gwella parodrwydd.
Wrth i Gymru gamu i mewn i’r tymor llosgi, mae gan reolaeth tir cyfrifol rôl bwysig i’w chwarae wrth leihau llwythi tanwydd a helpu i feithrin tirweddau mwy gwydn. Mae llosgi dan reolaeth yn parhau i fod yn ffordd sefydledig a gwerthfawr o reoli tir pan gaiff ei gynllunio’n ofalus a’i gynnal yn ddiogel.
Gall ffermwyr a thirfeddianwyr losgi grug, glaswellt, rhedyn ac eithin rhwng 1 Hydref a 15 Mawrth, gyda’r cyfnod wedi’i ymestyn tan 31 Mawrth yn yr ucheldiroedd. Fodd bynnag, dylai unrhyw un sy’n bwriadu llosgi dan reolaeth sicrhau bod Cynllun Llosgi ar waith a bod yr holl ragofalon priodol wedi’u hystyried cyn i unrhyw dân gael ei gynnau.