Diffoddwr Tân i Gymryd Rhan yn Rali Dakar 2026

Bydd Diffoddwr Tân Gwasanaeth Tân ac Achub Canolbarth a Gorllewin Cymru (GTACGC) yn cymryd rhan mewn digwyddiad dygnwch oddi ar y ffordd sy'n croesi tir llawer anoddach na ralïau confensiynol – Rali Dakar.

Yn ddigwyddiad a gynhelir yn Saudi Arabia rhwng 3 ac 17 Ionawr, mae Rali Dakar yn cwmpasu 8,000km o dir garw, ac mae’r rali yn dechrau ac yn gorffen yn ninas arfordirol Yanbu yng Ngorllewin Saudi Arabia.  Yn cymryd rhan yn Rali Dakar 2026 bydd Neil Hawker, Diffoddwr Tân Ar Alwad yng Ngorsaf Dân Abercraf GTACGC.

Mae Rali Dakar yn adnabyddus fel un o'r cystadlaethau chwaraeon moduro mwyaf heriol ac anodd yn y byd, sy’n wthio cystadleuwyr i'r eithaf nid yn unig o ran dygnwch corfforol a dibynadwyedd mecanyddol ond hefyd o ran gwydnwch meddyliol.  Rhaid i’r gyrwyr frwydro yn erbyn amodau tywydd eithafol, heriau llywio peryglus, a'r bygythiad cyson o fethiant mecanyddol, ac i gyd tra’n dioddef blinder llethol rasio oddi ar y ffordd pellter hir.  Yn ogystal, mae dau gymal marathon eithafol sy'n mynd â’r cyfranogwyr ymhell i ganol yr anialwch, lle maen nhw’n gwersylla dros nos gyda dim ond ychydig o fwyd, cyflenwadau a phecynnau trwsio - prawf digamsyniol o wydnwch sy'n cadarnhau enw Rali Dakar fel yr antur mwyaf eithafol ym myd chwaraeon moduro.

Wrth siarad ar gymryd rhan yn y rali, dywedodd y diffoddwr tân Neil Hawkins:

"Mae'n anrhydedd i mi fod yn un o ddim ond pum beiciwr o Brydain sy'n cystadlu yn y categori beiciau modur.

Byddaf yn rasio yn y dosbarth Originals by Motul unwaith eto, lle mae reidwyr yn cwblhau'r digwyddiad llawn heb unrhyw gefnogaeth fecanyddol neu dîm, gan gynnal a chadw a thrwsio’u beiciau eu hunain bob nos ar ôl rasio.

Rali Dakar heb amheuaeth yw'r digwyddiad chwaraeon moduro anoddaf ar y ddaear.  Mae rhai pobl yn dringo Everest, eraill yn hwylio o gwmpas y byd, ond i rasiwr oddi ar y ffordd, y Dakar yw'r prawf mwyaf eithafol.  Mae'n gwthio sgìl, dygnwch, a phenderfyniad i'r eithaf, ac i mi, mae wedi bod yn freuddwyd gydol oes rydw i wedi bod yn ddigon ffodus i'w gwireddu.

Er mai dyma fydd fy nhrydedd Rali Dakar, dyma fydd fy un gyntaf tra’n gwasanaethu gyda GTACGC, ac rwy'n hynod falch o gynrychioli'r Gwasanaeth a'i werthoedd ar lwyfan byd-eang.

Fe wnes i gystadlu yn gyntaf yn 2020, a phan ddychwelais yn 2021, gorffennais yn llwyddiannus yn y 37fed safle yn gyffredinol a 6ed yn y dosbarth Originals by Motul (heb gefnogaeth) - y ffordd fwyaf anodd o rasio Dakar.  Ym mis Ionawr 2026, byddaf unwaith eto yn ymgymryd â'r her hon, y tro hwn fel aelod balch o GTACGC."

Ar hyn o bryd mae Neil yn hyfforddi ar gyfer y rali, ochr yn ochr â'i rôl fel Diffoddwr Tân Ar Alwad, ei brif swydd, a bydd yn gadael y DU am Saudi Arabia ddiwedd mis Rhagfyr. 

Mae pawb yn GTACGC yn dymuno pob lwc i Neil wrth iddo gymryd rhan yn Rali Dakar!