Am 8.02yb ddydd Sadwrn, 31 Awst, cafodd criwiau Gwasanaeth Tân ac Achub Canolbarth a Gorllewin Cymru o orsafoedd tân Rhydaman, Dyffryn Aman, Y Tymbl, Pontardawe a Threforys eu galw i ddigwyddiad ar Stryd y Coleg yn Rhydaman.
Ymatebodd y criwiau i dân mewn eiddo preswyl uwchben eiddo masnachol. Roedd llawr cyntaf a tho'r adeilad ar dân pan gyrhaeddodd y criwiau, gyda'r fflamau’n lledu i adeiladau cyfagos. Defnyddiodd y criwiau 11 set o gyfarpar anadlu, dwy jet olwyn pibell, dau gamera delweddu thermol, un ysgol 13.5 metr, ysgol saith metr, un peiriant trofwrdd a ddefnyddiwyd fel tŵr dŵr ac un jet diogelwch i ddiffodd y tân.
Gadawodd criwiau'r safle am 11.38yb, gyda rhai criwiau'n dychwelyd yn ddiweddarach y diwrnod hwnnw i fonitro a gwlychu mannau oedd yn dal i fod yn broblemus.
Roedd angen ymateb amlasiantaeth i'r digwyddiad hwn gyda Heddlu Dyfed-Powys a'r Awdurdod Lleol yn bresennol.
A allech chi fod yn Ddiffoddwr Tân Ar Alwad?
Mae Diffoddwyr Tân Ar Alwad yn rhan hanfodol o’n Gwasanaeth ac eich cymuned.
Mae Gwasanaeth Tân ac Achub Canolbarth a Gorllewin Cymru ar hyn o bryd yn recriwtio Diffoddwyr Tân Ar Alwad ym mhob un o’n Gorsafoedd Tân Ar Alwad.
Mae rôl Diffoddwr Tân Ar Alwad yn darparu llawer o gyfleoedd ar gyfer datblygiad personol a phroffesiynol, trwy hyfforddiant, gwaith tîm, arweinyddiaeth a datrys problemau. Mae Diffoddwyr Tân Ar Alwad yn derbyn tâl am eu gwasanaethau, gan gynnwys ffioedd cadw a thaliadau galw allan, gan ychwanegu at eu hincwm o gyflogaeth arall.