Dull Newydd wedi'i Gynllunio ar gyfer Ymateb i Alwadau Larymau Tân Awtomatig

Bydd Gwasanaeth Tân ac Achub Canolbarth a Gorllewin Cymru (GTAGC) yn gweithredu dull newydd o ymateb i alwadau Larymau Tân Awtomatig (LTA), o 1 Gorffennaf, 2024.

Nod y fenter strategol hon yw sicrhau'r dyraniad adnoddau gorau posibl, lleihau aflonyddwch diangen, a gwella effeithlonrwydd cyffredinol yn ein hymateb brys.

Mae Larymau Tân Awtomatig (LTA) wedi'u cynllunio i ganfod presenoldeb mwg neu fflamau a rhybuddio unigolion am beryglon tân posibl. Ond, mae ystadegau'n dangos bod mwyafrif y signalau o'r systemau hyn mewn gwirionedd yn alwadau ffug, sy’n aml yn deillio o fwg coginio, llwch neu ddiffyg cynnal a chadw.

O ganlyniad i hyn, o 1 Gorffennaf, ni fydd GTAGC yn ymateb i alwadau LTA mwyach, ac eithrio mewn amgylchiadau penodol gan gynnwys safleoedd preswyl, cartrefi nyrsio a gofal, a safleoedd sy’n destun hysbysiadau gwahardd neu orfodi diogelwch tân.

Dywedodd y Pennaeth Risg Corfforaethol a Rheolwr Ardal, Peter Greenslade:

Hoffem fanteisio ar y cyfle hwn i sicrhau’r cyhoedd o ymrwymiad diwyro'r Gwasanaeth i ymateb brys a diogelwch cymunedol, gyda'r dull newydd hwn wedi'i gynllunio er mwyn gwella darpariaeth gwasanaethau a gwneud y defnydd gorau o adnoddau.

Gwyliwch yr animeiddiad byr hwn yn esbonio pam mae hyn yn digwydd a sut y bydd yn gwella'r gwasanaeth.

I gael rhagor o wybodaeth a diweddariadau, ewch i'n gwefan www.tancgc.gov.uk neu cysylltwch â Fireprotection@mawwfire.gov.uk