Gardd Gymunedol yn Agor yn Swyddogol yng Ngorsaf Dân y Trallwng

Mae Gwasanaeth Tân ac Achub Canolbarth a Gorllewin Cymru (GTACGC) yn falch iawn o gyhoeddi agoriad swyddogol gardd gymunedol newydd yng Ngorsaf Dân y Trallwng.

Cafodd yr ardd ei dadorchuddio’n ffurfiol ddydd Iau, 12 Chwefror, yn ystod bore coffi cymunedol a gynhaliwyd yn yr orsaf gyda nifer o bobl yn bresennol.

Gwahoddwyd trigolion lleol i ymuno â Diffoddwyr Tân y Trallwng am ddiodydd poeth a chacennau cartref, gan greu awyrgylch cynnes a chroesawgar i ddathlu'r achlysur.  Roedd y digwyddiad yn gyfle i aelodau o'r cyhoedd gwrdd â'r tîm, dysgu mwy am y prosiect a gweld drostynt eu hunain sut y bydd y man o fudd i'r Gwasanaeth a'r gymuned ehangach.  Roedd llawer o'r bobl oedd yno yn drigolion Neuadd Maldwyn, datblygiad byw yn annibynnol gyferbyn â'r orsaf.

Agorwyd yr ardd yn swyddogol gan Reolwr yr Orsaf, Kerry Hughes, a gynigiodd yn gyntaf y syniad o greu man awyr agored y gallai Diffoddwyr Tân a'r gymuned ei rannu.  Yna gwahoddwyd y sawl oedd yno i gymryd rhan mewn plannu amrywiaeth o flodau, llwyni a pherlysiau yn y gwelyau uchel newydd eu hadeiladu.

Mae'r ardd wedi'i chynllunio i fod yn gwbl hygyrch ac mae'n cynnwys cafnau plannu uchel, delltwaith a thŷ gwydr, gan sicrhau bod pobl o bob oed a gallu yn gallu mwynhau a chyfrannu ato.  Mae offer a chyfarpar ar gael ar y safle i unrhyw un sy'n dymuno cymryd rhan a defnyddio'r ardd.

Dywedodd Rheolwr yr Orsaf, Kerry Hughes, fod y prosiect yn adlewyrchu ymrwymiad y Gwasanaeth i ymgysylltu â’r gymuned a llesiant cymunedol:

"Mae'r ardd hon yn fwy na man gwyrdd yn unig, mae'n fan lle gall pobl ddod at ei gilydd, ymlacio, ac ailgysylltu â natur.  Rydym yn falch o'i agor i'r gymuned ac yn edrych ymlaen at ei weld yn tyfu ac yn ffynnu."

Bydd yr ardd yn encil heddychlon i bersonél GTACGC a thrigolion lleol, gan gynnig amgylchedd tawel i ymlacio, myfyrio a mwynhau'r awyr agored.  Y gobaith yw y bydd y man yn parhau i ddatblygu trwy gyfranogiad parhaus y gymuned a gweithgareddau plannu tymhorol.

Mae Gardd Gymunedol Gorsaf Dân y Trallwng wedi cael cefnogaeth garedig gan Raglen Lleoedd Lleol ar gyfer Natur Llywodraeth Cymru a Cadwch Gymru'n Daclus.

Prif Swyddog Cynorthwyol GTACGC, Mydrian Harries, yn cymryd rhan.

Mannau Gwyrdd

Yn ystod y blynyddoedd diwethaf, mae nifer o brosiectau wedi'u cwblhau ar safleoedd GTACGC i ddatblygu gerddi ar fannau gwyrdd sydd ar gael i wella ac annog bioamrywiaeth, i wella cynaliadwyedd amgylcheddol ac i sicrhau lles staff. 

Mae'r prosiectau hyn yn garreg filltir arwyddocaol o ran cyflawni rhwymedigaeth y Gwasanaeth o dan Ddyletswydd Adran 6 Deddf yr Amgylchedd (Cymru) 2016 ac yn ei ymrwymiad i leihau ei effaith amgylcheddol.  Darllenwch fwy am amcanion amgylcheddol a chynaliadwyedd y Gwasanaeth yma.