Ddydd Sadwrn, 7 Mehefin, daeth diffoddwyr tân o bob cwr o'r DU at ei gilydd ym Marina Abertawe i gymryd rhan yn Her Ffitrwydd Diffoddwyr Tân Cymru, sy'n rhan o gyfres Her Diffoddwyr Tân Prydain.
Mae Her Ffitrwydd Diffoddwyr Tân Cymru yn cael ei threfnu gan Wasanaeth Tân ac Achub Canolbarth a Gorllewin Cymru (GTACGC), ac mae’n helpu i godi arian pwysig i Elusen y Diffoddwyr Tân, sy'n cefnogi lles meddyliol ac iechyd corfforol holl aelodau teulu tân y DU sy'n gwasanaethu ac sydd wedi ymddeol.
Fe werthwyd yr holl leoedd yn y digwyddiad yn yr amser cyflymaf erioed, sef 21 munud. Cynhaliwyd y digwyddiad yn Sgwâr Dylan Thomas, Marina Abertawe, am y drydedd flwyddyn. Roedd y sgwâr unwaith eto yn llawn gwylwyr o'r dechrau i'r diwedd trwy gydol y dydd.
Roedd pob cystadleuydd wedi'i wisgo mewn cit diffodd tân strwythurol llawn ac yn cymryd rhan mewn cyfres o heriau corfforol a gynlluniwyd i brofi eu cryfder, eu hystwythder a'u stamina. Roedd cyfanswm o wyth her i'w cwblhau. Roedd hyn yn cynnwys rhedeg 50m, cario pibell am 50m, cario a chodi offer Gwrthdrawiadau Traffig ar y Ffordd (RTC), taro â morthwyl, rhedeg gyda phibell am 50m arall, rholio pibell i fyny, cario cynhwysydd, ac yn olaf, llusgo dymi. Y cystadleuydd cyflymaf i gwblhau'r wyth her oedd yn ennill y ras.
Ochr yn ochr â'r heriau ffitrwydd diffoddwyr tân, cynhaliodd GTACGC 'Bentref Diogelwch Cymunedol' lle roedd aelodau'r cyhoedd yn gallu cael cyngor a gwybodaeth am ddiogelwch yn rhad ac am ddim gan ein Tîm Diogelwch Cymunedol yn ogystal ag amrywiaeth o sefydliadau partner. Dyma rai o'r rhai a ymunodd â ni ar y diwrnod: Heddlu De Cymru, Gan Bwyll, Guide Dogs Cymru, Specsavers y Mwmbwls, Wales and West Utilities, Sadie's Butterflies, y Groes Goch Brydeinig Bwrdd Iechyd Prifysgol Bae Abertawe.
Hoffem ddiolch yn fawr iawn i bawb a gymerodd ran yn y digwyddiad. Yn enwedig i'r trefnwyr: Dominic Norcross, Luke Fisher, Tim Frost a'u tîm cyfan, ynghyd â Roshnara Ali am gydlynu'r Pentref Diogelwch Cymunedol. Hoffem hefyd ddiolch yn arbennig i Gadetiaid Tân GTACGC a weithiodd yn ddiflino trwy gydol y dydd, gan ailosod y cwrs ar ôl pob rownd. Roedd y gwylwyr a oedd yn bresennol ar y diwrnod wedi gwneud y digwyddiad yn llwyddiant ysgubol. Roedd y gymeradwyaeth gyson a'r brwdfrydedd yn ysgogi pawb a gymerodd ran, gan greu awyrgylch anhygoel i bawb.
Dywedodd y Prif Swyddog Tân Roger Thomas: