01.04.2025

Prif Swyddog Tân Gwasanaeth Tân ac Achub Canolbarth a Gorllewin Cymru yn Canmol yr Ymateb i Lif o Alwadau am Danau Glaswellt

Mae Prif Swyddog Tân Gwasanaeth Tân ac Achub Canolbarth a Gorllewin Cymru wedi canmol ymdrechion eithriadol ei staff yn wyneb nifer o danau glaswellt a ddigwyddodd yn sgil y tywydd sych diweddar. 

Gan Steffan John

Categorïau



Mae Prif Swyddog Tân (PST) Gwasanaeth Tân ac Achub Canolbarth a Gorllewin Cymru (GTACGC) wedi canmol ymdrechion eithriadol ei staff yn wyneb nifer o danau glaswellt a ddigwyddodd yn sgil y tywydd sych diweddar. 

Mae PST Roger Thomas KFSM wedi canmol gwytnwch, ymroddiad, a chydweithrediad aelodau criw’r ochr weithredol ynghyd â gweithredwyr y Ganolfan Rheoli Tân ar y Cyd (JFC) dan amodau heriol.  Dros y pythefnos diwethaf, mae criwiau ar draws ardal ymateb y Gwasanaeth wedi ymateb i dros 250 o danau glaswellt. 

Nid diffoddwyr tân ar y rheng flaen oedd yr unig rai i deimlo’r pwysau anarferol hwn, a bu gweithredwyr y Ganolfan Rheoli Tân ar y Cyd, sef y gwasanaeth sy’n cael ei rannu rhwng GTACGC a Gwasanaeth Tân ac Achub De Cymru, yn brysur iawn hefyd.  Yn ystod y pythefnos dan sylw, cafodd gweithredwyr y Ganolfan Rheoli Tân ar y Cyd nifer syfrdanol o alwadau, a bu un cyfnod o 24 awr pan gafwyd dros 1,000 o alwadau.




Wrth drafod y gyfres ddiweddar o danau glaswellt, dywedodd PST Roger Thomas KFSM:

"Mae'r cynnydd diweddar yn nifer y tanau glaswellt wedi rhoi pwysau aruthrol ar ein hadnoddau, ond mae ein holl staff wedi arddangos proffesiynoldeb, gwytnwch a chydweithrediad – y rhinweddau sy'n diffinio ein Gwasanaeth.  Mae ein staff hefyd wedi dangos eu hymroddiad parhaus i amddiffyn y cymunedau rydyn ni'n eu gwasanaethu.

Rydw i, y Tîm Arweinyddiaeth Weithredol, ac Aelodau ein Hawdurdod Tân yn ymwybodol o’u hymdrechion diflino, a hynny’n aml dan amodau eithriadol a heriol.



Dywedodd Pennaeth y Ganolfan Rheoli Tân ar y Cyd, y Rheolwr Grŵp Natalie Pearce:

"Daeth holl aelodau’r Ystafell Reoli ynghyd yn ystod y cyfnod heriol hwn.

Dangosodd staff y Ganolfan Rheoli Tân ar y Cyd ymroddiad ac ymdrech trwy weithio oriau ychwanegol a thrwy ymateb i geisiadau i’w hadalw ar ddyletswydd, gan ganiatáu inni gadw rheolaeth well mewn cyfnod pan fu pum gwaith yn fwy o alwadau nag arfer."




  • Dyma rai o’r digwyddiadau mwyaf:

    • Tân glaswellt yn effeithio ar oddeutu pedwar hectar o dir ym Mhonterwyd, ger Aberystwyth, ddydd Iau, Mawrth 6.
    • Tân glaswellt yn effeithio ar oddeutu 50 hectar o redyn a choed yn Rhaeadr Gwy ddydd Mercher, Mawrth 19.
    • Tân glaswellt yn effeithio ar ardal o tua 300 metr wrth 500 metr o eithin a glaswelltir yng Nghwmdu ger Crucywel ddydd Iau, 20 Mawrth.
    • Tân glaswellt yn effeithio ar oddeutu 20 hectar o laswellt, prysglwyni a phrysgwydd yn y Cymer ddydd Sul, Mawrth 23.


Bwrdd Tanau Gwyllt Cymru

Mae GTACGC yn aelod o Fwrdd Tanau Gwyllt Cymru, sy’n ddull aml-asiantaethol o wella ein dealltwriaeth a’n rheolaeth o’r perygl y mae tanau gwyllt yn ei beri i amgylchedd a chymunedau Cymru.

Mae tanau gwyllt yn gyfrifol am ddinistrio miloedd o hectarau o gefn gwlad, mannau agored a chynefinoedd bywyd gwyllt bob blwyddyn.  Bydd partneriaid y Bwrdd Tanau Gwyllt yn ymrwymo i weithio gyda'n cymunedau er mwyn creu tirwedd sy’n iachach ac yn fwy gwydn, a hynny trwy wella bioamrywiaeth ar gyfer ein dyfodol.  Darllenwch fwy yma.


Erthygl Flaenorol Erthygl Nesaf

Y Newyddion Diweddaraf

GWELD POB NEWYDDION