13.03.2025

Sioe Deithiol Cydnerthedd Cenedlaethol Cymru

Ddydd Llun, 3 Mawrth, dechreuodd Sioe Deithiol Cydnerthedd Cenedlaethol Cymru yng Nghanolfan Hyfforddi Earlswood Gwasanaeth Tân ac Achub Canolbarth a Gorllewin Cymru.

Gan Steffan John



Ddydd Llun, 3 Mawrth, dechreuodd Sioe Deithiol Cydnerthedd Cenedlaethol Cymru yng Nghanolfan Hyfforddi Earlswood Gwasanaeth Tân ac Achub Canolbarth a Gorllewin Cymru (GTACGC).

Gan deithio ar draws y tri Gwasanaeth Tân ac Achub yng Nghymru - GTACGC, Gwasanaeth Tân ac Achub Gogledd Cymru (GTAGC) a Gwasanaeth Tân ac Achub De Cymru (GTADC) – nod y sioe deithiol oedd cynyddu ymwybyddiaeth staff y Gwasanaeth o'r galluoedd a'r darpariaethau Cydnerthedd Cenedlaethol sydd ar gael yng Nghymru.  Mae’r sioe deithiol, sy’n cael ei chyflwyno drwy gyfuniad o sesiynau damcaniaethol ac ymarferol, yn cyflwyno gwybodaeth am yr adnoddau a’r sgiliau sydd ar gael ledled Cymru i gynorthwyo mewn digwyddiadau ac i gefnogi’r Gwasanaeth Tân ac Achub lleol i ddatrys y cais gweithredol.

Cafodd staff y Gwasanaeth a aeth i ddigwyddiadau’r sioe deithiol drosolwg damcaniaethol a’r cyfle i wylio arddangosiad chwilio ac achub gan Chris a Cooper, Tîm USAR K9, a gwelsant y datblygiadau technolegol diweddaraf sydd ar gael i gynorthwyo wrth ymateb i ddigwyddiadau yn ymwneud â deunyddiau peryglus.  Cyflwynwyd sesiynau gan yr Uned Ymateb i Ddeunyddiau Peryglus (HMRU) o Orsafoedd Tân Doc Penfro a Bae Colwyn, gyda chefnogaeth y Tîm Monitro Gwybodaeth am Ganfod (DIM), sydd wedi'i leoli o fewn GTADC.  Roedd y diwrnod hefyd yn cynnwys arddangosiad o'r gwahanol gerbydau ac asedau sydd ar gael, megis peiriannau Pwmpio Cyfaint Uchel (HVP) a dronau chwilio ac achub.

Gall unrhyw un o dri Gwasanaeth Tân ac Achub Cymru ofyn i Dîm Cydnerthedd Cenedlaethol Cymru am gymorth mewn amryw o ddigwyddiadau, gan gynnwys strwythurau sydd wedi'u difrodi neu sy’n anniogel, canfod sylweddau peryglus, pobl sydd ar goll, achub pobl sydd wedi’u hanafu, dadheintio torfol a mwy.





Yn cydlynu'r sioe deithiol roedd Arweinydd Gallu Tîm Chwilio ac Achub Trefol Cymru (USAR), sef y Rheolwr Gorsaf Gareth Lewis, a ddywedodd:

"Mae hwn wedi bod yn gyfle gwych i ymgysylltu â chydweithwyr o dri Gwasanaeth Tân ac Achub Cymru, ac i dynnu sylw at yr amrywiaeth o sgiliau, adnoddau ac asedau sydd gan Dîm Cydnerthedd Cenedlaethol Cymru i'w cynorthwyo mewn digwyddiadau.

Mae'r sioe deithiol wedi teithio dros 686 milltir ac wedi rhoi'r cyfle i ddatblygu perthnasoedd newydd ar draws y tri Gwasanaeth Tân ac Achub a fydd yn y pen draw yn helpu i gadw cymunedau Cymru'n ddiogel.  Hoffwn ddiolch i bawb a ddaeth ac a fu'n rhan o drefnu'r sioe deithiol."



Rhwng dydd Llun, 3 Mawrth a dydd Iau, 6 Mawrth, ymwelodd y Sioe Deithiol Cydnerthedd Cenedlaethol â Chanolfan Hyfforddi Earlswood yn Abertawe, Canolfan USAR yng Ngorsaf Dân yr Eglwys Newydd, Gorsaf Dân y Drenewydd a Gorsaf Dân y Rhyl.

Mae Tîm USAR Cymru ar alwad 24 awr y dydd, 365 diwrnod y flwyddyn i ymateb i ddigwyddiadau a thrychinebau ledled y DU, i ddarparu gallu chwilio ac achub ac i gefnogi ymdrechion dyngarol.





Erthygl Flaenorol Erthygl Nesaf