Taith Nadolig Gorsaf Dân Llanandras er budd y Banc Bwyd

Aeth Diffoddwyr Tân Gorsaf Dân Llanandras ar eu hail 'Siwrnai Siôn Corn' yn ddiweddar er budd banc bwyd lleol.

Bu Diffoddwyr Tân Llanandras, gydag un ohonyn nhw wedi gwisgo fel Siôn Corn, yn teithio trwy’r dref a’r pentrefi cyfagos mewn injan dân er mwyn rhannu hwyl yr ŵyl ac i gasglu eitemau gan y trigolion lleol i’w rhoi i fanc bwyd Tref-y-clawdd a Llanandras.

Mae Banc Bwyd Tref-y-clawdd a Llanandras yn brosiect cymunedol sy'n cefnogi unigolion a theuluoedd sy'n wynebu newyn neu argyfwng ar draws ardal Tref-y-clawdd, Llanandras a Dwyrain Maesyfed.  Mae'r Banc Bwyd hefyd yn rhoi gwasanaeth allgymorth hanfodol yn Llanandras sy'n sicrhau bod help yn cyrraedd y rhai sydd ei angen fwyaf.

Dywedodd Helen, Rheolwr Banc Bwyd Tref-y-clawdd a Llanandras:

“Mae'r criw o Orsaf Dân Llanandras wedi bod yn anhygoel, ac rydyn ni mor ddiolchgar am eu cefnogaeth.  Rydw i wedi cael negeseuon amdano gan sawl teulu, a lluniau o'r plant wrth eu boddau’n cwrdd â Siôn Corn.”

Trwy gynnal y Siwrnai Siôn Corn ar gyfer y Banc Bwyd, mae Gorsaf Dân Llanandras yn dangos eu hymrwymiad dwfn i'r gymuned, gan ymateb mewn cyfnod o argyfwng a chan gefnogi mentrau lleol drwy gydol y flwyddyn.

Mae'r criw yng Ngorsaf Dân Llanandras a Gwasanaeth Tân ac Achub Canolbarth a Gorllewin Cymru yn hynod ddiolchgar i bawb sydd wedi cefnogi a chyfrannu at Siwrnai Siôn Corn.

Lluniau gan Laura Shepherd's Lens Photography.