Wyth Diffoddwr Tân Ar Alwad Newydd yn Cwblhau Hyfforddiant Cychwynnol

Ddydd Llun, Hydref 26ain, dathlodd Gwasanaeth Tân ac Achub Canol a Gorllewin Cymru (GTACGC) lwyddiannau wyth Diffoddwr Tân Ar Alwad newydd, mewn Seremoni Cwblhau a gynhaliwyd yng Ngorsaf Dân y Drenewydd.

Roedd y seremoni yn nodi diwedd cyfnod o wythnosau o hyfforddiant dwys ac ymroddiad, wrth i'r recriwtiaid gwblhau eu cwrs hyfforddi cychwynnol yn llwyddiannus a chymryd cam pwysig tuag at wasanaethu a diogelu eu cymunedau lleol.

Daeth teulu, ffrindiau a chydweithwyr at ei gilydd i wylio cyfres o arddangosiadau ar yr iard ymarfer, gan arddangos y sgiliau a'r wybodaeth y mae'r recriwtiaid wedi'u datblygu drwy gydol eu hyfforddiant.  Rhoddodd yr arddangosfeydd gipolwg ar yr heriau y mae Diffoddwyr Tân yn eu hwynebu a'r safonau uchel sy'n ofynnol i ddod yn Ddiffoddwyr Tân gweithredol.

Yn ystod y cwrs, derbyniodd y recriwtiaid hyfforddiant mewn ystod eang o sgiliau diffodd tân ac ymateb brys hanfodol, gan gynnwys technegau diffodd tân, defnyddio offer, gofal trawma a chleifion, ac ymateb i wrthdrawiadau traffig ar y ffyrdd.  Bydd y sgiliau hyn yn eu helpu i baratoi i ymateb yn ddiogel ac yn effeithiol i amrywiaeth o ddigwyddiadau ledled Canolbarth a Gorllewin Cymru.

Yn dilyn yr arddangosiadau, cyflwynwyd tystysgrifau i bob recriwt gan Sean Lloyd, Prif Swyddog Tân Cynorthwyol GTACGC, i gydnabod eu bod wedi cwblhau'r cwrs yn llwyddiannus.

Mae'r Seremoni Cwblhau yn garreg filltir bwysig yn nhaith pob Diffoddwr Tân.  Wrth iddynt ymuno â'u Gorsafoedd Tân priodol ledled ardal y Gwasanaeth, byddant yn chwarae rhan hanfodol wrth ymateb i argyfyngau, cefnogi mentrau diogelwch cymunedol, a helpu i ddiogelu'r cymunedau lle maent yn byw ac yn gweithio.

Roedd y digwyddiad yn gyfle i ddathlu nid yn unig iddynt gwblhau'r cwrs yn llwyddiannus, ond hefyd yr ymrwymiad, y gwydnwch a'r dyfalbarhad a ddangoswyd gan bob recriwt drwy gydol eu hyfforddiant.

Mae pawb yn GTACGC yn llongyfarch y Diffoddwyr Tân Ar Alwad newydd ar y cyflawniad rhagorol hwn, ac yn dymuno pob llwyddiant iddynt wrth iddynt ddechrau eu gyrfaoedd gweithredol.

Llongyfarchiadau, a chroeso i'r Gwasanaeth.