Ymweliadau Diogel ac Iach

Mae Gwasanaeth Tân ac Achub Canolbarth a Gorllewin Cymru wedi ymrwymo i ddarparu’r gwasanaeth gorau posibl ar gyfer cymunedau Canolbarth a Gorllewin Cymru.

Os ydych chi'n byw yng Nghanolbarth a Gorllewin Cymru, rydyn ni'n cynnig y cyfle i gael Ymweliad Diogel ac Iach yn eich cartref.  Maent yn rhad ac am ddim ac ar gael i bawb.  Ewch yma i weld y rhestr lawn o'n Gorsafoedd Tân a'r ardal rydyn ni'n ei gwasanaethu.

Os ydych yn byw yng Nghymru ond nid yn ardal ein gwasanaeth, cysylltwch â Gwasanaeth Tân ac Achub Gogledd Cymru neu Wasanaeth Tân ac Achub De Cymru.

Mae'r ymweliad Diogel ac Iach yn cynnwys popeth a oedd yn rhan o'r gwiriadau diogelwch tân yn y cartref ond mae'n cynnwys negeseuon diogelwch eraill hefyd a all fod yn berthnasol i'r bobl sy'n byw yn yr eiddo. Bydd y pum prif neges ychwanegol yn ymwneud â'r canlynol:

• Rhoi'r gorau i ysmygu
• Diogelwch y cartref
• Atal cwympo
• Ymwybyddiaeth o sgamiau
• Mynd i'r afael ag unigrwydd ac arwahanrwydd

Archwiliwr Diogelwch Tân yn y Cartref Ar-lein.

Mae'r archwiliad diogelwch tân yn y cartref hwn, sy’n hawdd ei ddilyn, wedi'i ddatblygu trwy bartneriaeth rhwng Cyngor Cenedlaethol y Penaethiaid Tân (NFCC), ymgyrch Fire Kills a Safelincs. Bydd yn eich tywys chi o gwmpas eich cartref un ystafell ar y tro a bydd y cwestiynau syml yn eich helpu i ddod o hyd i risgiau tân wrth i chi fynd o gwmpas eich cartref.

Bydd yr archwiliwr yn cynnig awgrymiadau a chyngor ar y camau y gallwch eu cymryd i leihau’r risgiau hynny. Ar y diwedd, byddwch yn cael cynllun gweithredu diogelwch tân personol er mwyn helpu i’ch diogelu chi a'ch cartref rhag tân.

Mae cael o leiaf un larwm mwg gweithredol ar bob llawr yn y cartref a phrofi pob larwm yn rheolaidd yn parhau i fod yn un o negeseuon canolog yr ymgyrch. Mae ymgyrch Fire Kills hefyd yn anelu at godi ymwybyddiaeth ymhlith y cyhoedd, ac yn enwedig ymysg grwpiau bregus, o'r risgiau tân posibl a’r damweiniau cyffredin sy'n achosi’r rhan fwyaf o danau yn y cartref yn y DU.

Fel arall gallwch archebu ymweliad Diogel ac Iach am ddim trwy:

Cysylltwch â ni ar 0800 169 1234 neu llenwch ein ffurflen ar-lein. Os oes gennych chi larwm diffygiol a osodwyd gan y Gwasanaeth Tân ac Achub, cysylltwch â 0800 169 1234 i gael un newydd neu anfonwch e-bost at saw@mawwfire.gov.uk.

Os ydych yn atgyfeirio ar ran Asiantaeth, cwblhewch y Ffurflen Atgyfeirio Asiantaeth.

Cefnogir darparu larymau mwg ac eitemau diogelwch cartref eraill gan Wasanaeth Tân ac Achub Canolbarth a Gorllewin Cymru gan gyllid gan Lywodraeth Cymru.